Душанбе, 15 январ, – АИ «Корвон Иттилоот». Кумитаи оид ба корҳои дини назди Ҳукумати Ҷумҳурии Тоҷикистон арзиши расмии ҳаҷро барои шаҳрвандони кишвар дар соли 2026 эълон намуд. Ба иттилои сухангӯи кумита Афшини Муким, маблағи пардохт 53 ҳазор сомониро ташкил дода, нисбат ба соли гузашта 3,8 ҳазор сомонӣ кам шудааст.

Соли 2025 зоирони тоҷик барои анҷом додани ҳаҷ 56,8 ҳазор сомонӣ пардохт мекарданд. Ба гуфтаи масъулон, коҳиш ёфтани нарх натиҷаи танзими хароҷот ва ҳамоҳангсозии шартҳо бо ҷониби қабулкунанда мебошад. Пардохти маблағ танҳо ба таври ғайринақдӣ тавассути «Ориёнбанк» иҷозат дода шудааст.

Қабули ҳуҷҷатҳо барои ҳаҷҷи соли 2026 ба анҷом расидааст. Ин тасмим ба талаботи нави Арабистони Саудӣ вобаста аст, ки тибқи онҳо раванди бақайдгирии зоирон дар кишварҳои иштирокчӣ барвақт оғоз гардид. Ҳамзамон Кумитаи оид ба корҳои дин озмун барои интихоби роҳбаладон эълон намудааст.

Маблағи муайяншуда тамоми хароҷотро дар бар мегирад: парвоз, иқомат дар меҳмонхонаҳои Макка ва Мадина, таъмини севақтаи ғизо, хизматрасонии роҳбалад, ташкили маросимҳо дар Мино, Арафот ва Муздалифа, инчунин пардохти қурбонӣ. Илова бар ин, маблағ барои нақлиёт, суғуртаи тиббӣ, боҷҳои давлатӣ ва таъмин намудани зоирон бо адабиёти зарурӣ равона карда мешавад.

Кумита шаҳрвандонро ҳушдор медиҳад, ки ба таблиғоти ширкатҳои хусусие, ки худро ташкилкунандаи ҳаҷ муаррифӣ мекунанд, бовар накунанд, зеро чунин ваколат танҳо ба ниҳодҳои давлатӣ дода шудааст.

Ҳамчунин таъкид гардид, ки барои анҷом додани ҳаҷ бо роҳҳои ғайриқонунӣ ҷавобгарии сахт пешбинӣ шудааст. Тибқи қоидаҳои нави Арабистони Саудӣ, чунин шахсон бо ҷарима то 13,3 ҳазор доллари ИМА, маҳрум сохтан аз озодӣ то шаш моҳ ва депортатсия бо манъи вуруд ба муҳлати даҳ сол рӯ ба рӯ мегарданд.

АКС: АИ «Корвон Иттилоот»