Душанбе, 09 декабр, 2025г.- АИ «Корвон Иттилоот». Дар шаҳру ноҳияҳои вилояти Хатлон кишти пиёз ва картошка дар доираи нақшаҳои кишоварзӣ идома дошта, ҳосили он то оғози фасли баҳор ҷамъоварӣ карда мешавад. Ин амал барои таъмини бозорҳои дохилӣ ва берунӣ бо маҳсулоти босифати пиёз ва картошка аҳамияти калони иқтисодӣ дорад.

Тавре аз Сарраёсати кишоварзии вилояти Хатлон иттилоъ доданд, тибқи нақшаи имсолӣ дар нуҳ ҳазор гектар пиёз ва дар ҳашт ҳазор гектар картошка кишт карда мешавад. Дар ноҳияҳои гуногун, аз ҷумла ноҳияи Дӯстӣ, кишт бо истифода аз усулҳои муосири агротехникӣ амалӣ мешавад.

Масалан, дар ноҳияи Дӯстӣ дар масоҳати 23 гектар картошка дар зери плёнка кишт карда шудааст, ки ҳосили он то моҳи апрел ҷамъоварӣ хоҳад шуд. Ин таҷриба соли дуюм аст, ки барои беҳтар намудани ҳосилнокӣ ва ҳифзи маҳсулот аз сармо амалӣ мешавад.

Ба тавсияи олимони соҳаи кишоварзӣ, барои кишти тирамоҳӣ ва аввали фасли зимистон замин бояд бо истифодаи механизмҳои замонавӣ хуб коркард карда шавад. Дар як гектар замин то 30–40 тонна поруи пӯсида ва 70 фоизи миқдори зарурии нуриҳои фосфорӣ ва калийдор андохта мешавад.

Пас аз ин замин дар чуқурии 28–30 сантиметр шудгор карда шуда, картошка тавассути механизмҳо шинонида мешавад. Қаторҳои картошкае, ки дар ин мавсим шинонида мешаванд, бояд бо поруи пӯсида пӯшонида шаванд, то ҳосил аз тағйироти иқлимӣ ва хатарҳои табиӣ ҳифз карда шавад.

Иқлими вилояти Хатлон ба кишт ва парвариши пиёз ва картошка хеле мувофиқ аст. Ҳар сол кишоварзон дар ин минтақа ҳосили хуб ба даст меоранд ва бозорҳои маҳаллӣ ва минтақавиро бо маҳсулоти хушсифат таъмин мекунанд. Дар баробари ин, истифодаи технологияи замонавӣ ва риояи тавсияҳои мутахассисон имкон медиҳад, ки ҳосилнокӣ афзоиш ёбад ва сифати маҳсулот беҳтар гардад.

Инчунин, иҷрои чораҳои агротехникӣ ба самаранокии истифодаи замин, кам кардани талафи маҳсулот ва нигоҳдории хӯроки асосии аҳолӣ мусоидат мекунад. Ҳамзамон, кишти мақсаднок ва замонавӣ боиси таъсиси ҷойҳои нави корӣ ва рушди иқтисоди маҳаллӣ мегардад.

АКС: АИ «АВЕСТО»