Душанбе, 06 ноябр, – АИ «Корвон Иттилоот». Аз 7 то 21 ноябр дар пойтахти Арабистони Саудӣ – шаҳри Эр-Риёз Бозиҳои шашуми ҳамбастагии исломӣ баргузор мегарданд, ки ҳазорҳо варзишгарро аз даҳҳо кишвари мусалмони ҷаҳон гирд меоранд. Дар ин форуми бонуфузи байналмилалӣ Тоҷикистонро 65 варзишгар дар 10 намуди варзиш намояндагӣ хоҳанд кард, иттилоъ медиҳад Кумитаи кор бо ҷавонон ва варзиши назди Ҳукумати Ҷумҳурии Тоҷикистон.

Барномаи бозиҳо 23 намуди варзишро дар бар мегирад, ки ду самти паралимпиро низ фаро мегиранд: параатлетика ва парапауэрлифтинг. Дар Бозиҳо беш аз 3000 варзишгар аз 57 кишвари узви Иттиҳоди федератсияҳои варзиши исломӣ ширкат хоҳанд варзид.

Варзишгарони тоҷик дар намудҳои зерин ҳунарнамоӣ мекунанд: варзиши сабук, киберварзиш, волейбол, гуштии озод ва юнону румӣ, таэквондо, тенниси рӯимизӣ, футзал, ҷиу-ҷитсу, ҷудо ва шиноварӣ. Барои бисёре аз варзишгарони тоҷик ин мусобиқаҳо зинаи муҳими омодагӣ ба чемпионатҳои қитъавӣ ва ҷаҳонии оянда ба шумор мераванд.

Дастаи мунтахаби Тоҷикистон оид ба футзал таҳти роҳбарии Пайрав Воҳидов ба гурӯҳи «B» шомил шудааст, ки дар он рақибонаш дастаҳои Афғонистон, Эрон ва Марокко мебошанд. Дар бозии аввал, ки рӯзи 4 ноябр баргузор шуд, футзалбозони тоҷик бо ҳисоби 5:9 аз тими Афғонистон шикаст хӯрданд.

Дар даври дувум, ки 6 ноябр доир мегардад, варзишгарони мо бо дастаи Марокко ва 8 ноябр бо тими Эрон вомехӯранд. Ба гурӯҳи «A» дастаҳои Арабистони Саудӣ, Ӯзбекистон, Либия ва Озарбойҷон дохиланд. Аз ҳар гурӯҳ ду дастаи беҳтарин ба нимниҳоӣ роҳ меёбанд.

Дар риштаи ҷудо 7 варзишгари тоҷик ба рақобат мебароянд — панҷ мард ва ду зан: Ёсин Бобокалонов (то 66 кг), Абубакр Шеров (то 73 кг), Муҳаммадҷон Абдуҷалилзода (то 90 кг), Ҷаҳонгир Маджидов (то 100 кг), Темур Раҳимов (+100 кг), Ахлия Муминова (то 48 кг) ва Мадина Қурбонзода (то 52 кг).

Мусобиқаҳои ҷудо аз 8 то 10 ноябр баргузор мешаванд. Дар маросими ифтитоҳи Бозиҳо парчамбардори ҳайати варзишии Тоҷикистон Мадина Қурбонзода хоҳад буд — ин иқдом нишонаи қадршиносии дастовардҳои ӯ ва саҳмаш дар рушди варзиши занонаи кишвар аст.

Бозиҳои ҳамбастагии исломӣ аз соли 2005 баргузор мешаванд ва ҳадафи онҳо таҳкими дӯстӣ ва ҳамбастагии кишварҳои мусалмон тавассути варзиш мебошад. Аввалин Бозиҳо дар Макка (Арабистони Саудӣ) баргузор шуданд, сипас Палембанг (Индонезия, 2013), Боку (Озарбойҷон, 2017) ва Коня (Туркия, 2021) мизбонӣ намуданд. Бозиҳои дуюм, ки соли 2010 дар Эрон баргузор мегардиданд, баргузор нашуданд.

Дар тӯли солҳои иштирок варзишгарони тоҷик 15 медал ба даст овардаанд — 1 тилло, 4 нуқра ва 10 биринҷӣ. Медали ягонаи тиллоиро соли 2005 дар Макка варзишгари маъруф Дилшод Назаров ба Тоҷикистон овардааст.

Имрӯз ширкати Тоҷикистон дар Бозиҳои ҳамбастагии исломӣ на танҳо рӯйдоди варзишӣ, балки рамзи дӯстӣ, таҳаммулпазирӣ ва ҳамбастагии фарҳангӣ мебошад, ки варзиши муосири тоҷикро дар сатҳи байналмилалӣ ифода мекунад.

АКС: Кумитаи кор бо ҷавонон ва варзиши назди Ҳукумати Ҷумҳурии Тоҷикистон