Ўзбекистон Президенти Шавкат Мирзиёев 2024 йил 15 июль куни Малайзия Бош вазири Анвар Иброҳим билан телефон орқали мулоқот қилди.

Томонлар Малайзия бош вазирининг 2024 йил май ойида Ўзбекистонга ташрифи якунлари бўйича Ўзбекистон-Малайзия ҳамкорлигини ривожлантириш ва эришилган келишувларни амалга ошириш масалаларини муҳокама қилдилар.

Мулоқот чоғида мамлакатлар ўртасида парламентлараро, ҳукуматлараро ва ишбилармонлик алоқалари фаоллашгани таъкидланди. Саноат, «яшил» энергетика, нефть-кимё, электротехника ва бошқа соҳалардаги етакчи компанияларнинг кооперация лойиҳаларини илгари суришга алоҳида эътибор қаратилди.

Изоҳ. 2024 йил 29 май куни Малайзиянинг Путражая шаҳрида савдо-иқтисодий ҳамкорлик бўйича қўшма ҳукуматлараро комиссиянинг биринчи йиғилиши бўлиб ўтди. Учрашув якунида Ўзбекистон-Малайзия ишбилармонлар Кенгаши ташкил этилган.

Икки давлат раҳбарлари, шунингдек, гуманитар алмашинув ва зиёрат туризми дастурларини амалга ошириш бўйича чора-тадбирларни муҳокама қилдилар. Халқаро ва минтақавий кун тартибидаги масалалар, шунингдек, олий даражадаги бўлажак тадбирлар жадвали муҳокама қилинди.

Сурат: Ўзбекистон Республикаси Президентининг матбуот хизмати