Санкт-Петербургда Олий Maжлис Сенати раиси Танзила Норбоева Ҳиндистон парламенти қуйи палатаси Спикери Ом Бирла билан музокаралар ўтказди. Учрашувда Ўзбекистон билан Ҳиндистон ўртасидаги сиёсий, савдо-иқтисодий, маданий-гуманитар, сайёҳлик ва парламентлараро ҳамкорликни кенгайтириш масалалари муҳокама қилинди.

Мулоқот чоғида парламентлараро муносабатларни ривожлантиришнинг амалий жиҳатларига алоҳида эътибор қаратилди. Томонлар юқори савияда эришилган келишувларнинг бажарилиши устидан тизимли парламент назоратини ўрнатиш зарурлигини таъкидладилар.

Шунингдек, қонун ижодкорлиги соҳасида тажриба алмашиш ва электрон парламентни ривожлантириш муҳимлиги таъкидланди. Томонлар ушбу мақсадларга эришишга ёрдам берадиган ўзаро ташрифлар тўғрисида келишиб олдилар.

Учрашув натижасида юқорида қайд этилган барча жиҳатларни қамраб оладиган ҳамкорликни мустаҳкамлаш тўғрисидаги ҳужжат лойиҳасини ишлаб чиқиш ва тасдиқлаш тўғрисида битим тузилди. Бу қадам Ўзбекистон ва Ҳиндистон ўртасидаги алоқаларни янада мустаҳкамлаш, шунингдек, парламентлараро ҳамкорликни такомиллаштиришга қаратилган.

Сурат: UzDaily.uz