Қозоғистон Сув ресурслари ва ирригация вазирлиги Жаҳон банки билан биргаликда Орол денгизининг шимолини сақлаб қолиш лойиҳасининг иккинчи босқичини ишлаб чиқмоқда. Бу ҳақда бўлим бошлиғи Нуржан Нуржигитов Қизилўрда вилояти аҳолиси билан учрашувда маълум қилди. Ҳозирда Жаҳон банки гранти ҳисобидан лойиҳа учун зарур ҳужжатлар ишлаб чиқилмоқда.

Лойиҳа учта асосий компонентни ўз ичига олади:

* Шимолий Орол денгизи ва Сирдарё делтаси инфратузилмасини ривожлантириш ва гидрологик ҳолатини яхшилаш.

* Қизилўрда вилоятида барқарор иқтисодий, ижтимоий ва экологик вазиятни қўллаб-қувватлаш.

* Ахборот базаси ва сув хўжалиги тизимларини янгилаш.

Нуржан Нуржигитовнинг таъкидлашича, лойиҳанинг биринчи босқичи натижаларига кўра Кокорол тўғони қурилган ва Шимолий Оролда сув ҳажми 27,1 миллиард куб метрга етган. Иккинчи босқич сув ресурсларини бошқаришни такомиллаштириш, балиқчилик ва экотуризмни ривожлантириш, минтақанинг экологик ҳолатини яхшилаш, Шимолий Орол денгизида сув тўплаш ҳажми ва самарадорлигини оширишга қаратилган.

Сурат: Қозоғистон Республикаси Сув ресурслари ва ирригация вазирлиги