Ўтган ҳафта якунида Қозоғистон ва Ўзбекистон Бош вазирлари Олжас Бектенов ва Абдулла Арипов раислигида икки томонлама ҳамкорлик бўйича Қозоғистон-Ўзбекистон қўшма ҳукуматлараро комиссиясининг 21-йиғилиши бўлиб ўтди.

Учрашувда савдо-иқтисодий, сармоявий, сув-енергетика, транспорт, қишлоқ хўжалиги ва атроф-муҳит соҳаларидаги икки томонлама ҳамкорлик масалалари муҳокама қилинди.

Ўтган йил якунларига кўра, мамлакатлар ўртасидаги товар айирбошлаш ҳажми 4,5 миллиард долларни ташкил этган бўлса, 2024 йилнинг дастлабки 4 ойида бу кўрсаткич 1,2 миллиард доллардан ошди. Қозоғистон ва Ўзбекистонга Марказий Осиёдаги барча савдоларнинг 57 фоизи тўғри келади.

Саноат кооперацияси соҳасида улкан лойиҳаларни амалга ошириш режалаштирилган. Жами 3,1 миллиард долларлик 69 лойиҳани амалга ошириш, 14,7 мингдан ортиқ иш ўрни яратиш режалаштирилган. Қиймати 217 миллион долларлик 12 лойиҳа амалга оширилиб, 4,5 мингга яқин янги иш ўринлари яратилди.  

Бундан ташқари, Қозоғистоннинг Туркистон вилояти ва Ўзбекистоннинг Сирдарё вилояти ҳудудларида 100 гектар майдонга эга «Марказий Осиё» саноат кооперацияси халқаро марказини яратиш бўйича глобал лойиҳа мавжуд.  

«Ўзбекистон Қозоғистоннинг энг йирик савдо шерикларидан биридир. Икки Давлат раҳбарлари ҳукуматларимиз олдига ўрта муддатли истиқболда ўзаро савдо ҳажмини 10 миллиард долларга етказиш вазифасини қўйди. Бу йўналишда биз агросаноат мажмуаси ва озиқ—овқат саноати савдосини ошириш, шунингдек, саноат кооперацияси даражасини оширишдан манфаатдормиз», – деди Олжас Бектенов ўз нутқида.

Ўз навбатида, Ўзбекистон Бош вазири Абдулла Арипов икки мамлакат ўртасидаги муносабатлар стратегик шериклик ва иттифоқчилик руҳида ривожланиб бораётганини таъкидлади.

«Барча соҳаларда ижобий ўсиш кузатилмоқда. Бу қардош халқларимиз манфаатларига тўлиқ жавоб беради. Шубҳасиз, давлатларимиз раҳбарлари ўртасидаги дўстона ва ишончли муносабатлар бундай юксак даражадаги шерикликнинг муҳим омилидир. Ишончим комилки, бугунги учрашув ва эришилган келишувлар ҳамкорлигимизга қўшимча туртки беради», – деди Абдулла Арипов.

Сурат: МДҲ Ижроия қўмитасининг расмий сайти