Moskvada Rossiya Federatsiyasi ichki ishlar vaziri o‘rinbosari Aleksandr Gorovoy O‘zbekiston Respublikasi delegatsiyasi bilan ishchi uchrashuvni o‘tkazdi. O‘zbekiston tomoniga Vazirlar Mahkamasi huzuridagi Migratsiya agentligi direktori Bekzod Musayev boshchilik qildi. Tadbirda shuningdek, ichki ishlar vaziri o‘rinbosari Bekmurod Abdullayev va tashqi ishlar vaziri o‘rinbosari Olimjon Abdullayev ham ishtirok etdi.

Kun tartibidagi asosiy masala mamlakatlar o‘rtasidagi migratsiya sohasidagi hamkorlik bo‘ldi. Rossiya tomoni qonunchilikdagi o‘zgarishlar, jumladan, 5 fevraldan boshlab nazorat ostidagi shaxslar reyestri ishga tushirilishi haqida ma’lumot berdi. Shuningdek, Rossiya hududida bo‘lgan, shu jumladan zarur hujjatlarsiz yurgan O‘zbekiston fuqarolari to‘g‘risidagi statistik ma’lumotlar keltirildi. Ikki davlat vakillari migrantlarning huquqiy maqomini tartibga solish chora-tadbirlarini muhokama qilishdi.

Migratsiya qoidalarini buzgan shaxslarni nazorat qilish masalalariga alohida e’tibor qaratildi. Rossiya tomoni Rossiyada qonuniy mehnat faoliyatini yuritayotgan O‘zbekiston fuqarolari soni ortib borayotganini ta’kidlab, noqonuniy migratsiya darajasini pasaytirish uchun Toshkent tomonidan profilaktika ishlari olib borilishi zarurligini uqtirdi.

Uchrashuvda huquqni muhofaza qilish sohasini raqamlashtirish va axborot almashinuvi mavzusi ham ko‘tarildi. Tomonlar jamoat tartibini saqlash sohasidagi tajribalarini o‘rtoqlashib, yangi texnologiyalarni joriy etish va idoralararo hamkorlik istiqbollarini muhokama qilishdi.

Eslatib o‘tamiz, Rossiya prezidentining farmoniga ko‘ra, mamlakatda qonuniy asosda bo‘lish huquqini yo‘qotgan chet el fuqarolari o‘z maqomlarini 2025-yil 30-aprelgacha tartibga solishlari mumkin. Ushbu chora chet el fuqarolarining keng doirasiga, shu jumladan O‘zbekistondan kelganlarga ham taalluqlidir.