Anqarada O‘zbekiston, Turkiya va Ozarbayjon tashqi ishlar vazirlarining ikkinchi uch tomonlama uchrashuvi bo‘lib o‘tdi. Unda tashqi siyosat, savdo, investitsiyalar, transport va telekommunikatsiyalar sohasidagi hamkorlik masalalari muhokama qilindi.

O‘zbekiston TIV rahbari Baxtiyor Saidov respublika mintaqaning logistika tizimida hal qiluvchi rol o‘ynashi mumkinligini ta’kidladi. Bu yuk tashish barqarorligini ta’minlash va yangi transport yo‘laklarini yaratish orqali amalga oshirilishi mumkin. Global xavf-xatarlar sharoitida ushbu uch mamlakatning strategik mavqei alohida ahamiyat kasb etmoqda. Turkiya va Ozarbayjon O‘rta koridorning g‘arbiy darvozasi bo‘lsa, O‘zbekiston Buyuk Ipak yo‘li davrini eslatuvchi uning eng muhim tuguniga aylanmoqda.

Muzokaralar yakunida Anqara deklaratsiyasi imzolandi. Unda tomonlar muhim sohalarda hamkorlikni rivojlantirishga tayyorligini tasdiqladi. Hujjat mamlakatlarning suvereniteti va hududiy yaxlitligini mustahkamlash, Ozarbayjonning ozod qilingan hududlarini tiklashni qo‘llab-quvvatlash, iqtisodiyot, logistika, raqamlashtirish va infratuzilmani rivojlantirish, shuningdek, O‘rta koridorning raqobatbardoshligini oshirish bo‘yicha birgalikdagi sa’y-harakatlarni nazarda tutadi.

Markaziy Osiyodagi xavfsizlik masalalariga, jumladan, Afg‘onistondagi barqarorlik va Yaqin Sharqdagi insonparvarlik vaziyatiga alohida e’tibor qaratildi. Uchrashuv ishtirokchilari G‘azo sektorida o‘t ochishni to‘xtatish rejimiga rioya qilish muhimligini ta’kidladi.