Belarusning O‘zbekistondagi Favqulodda va muxtor elchisi Leonid Marinich jismoniy tarbiya va sport sohasidagi ikki tomonlama hamkorlik istiqbollarini muhokama qilish maqsadida O‘zbekiston sport vaziri Adham Ikromov bilan uchrashdi.

Elchi Belarus tashabbuslari qo‘llab-quvvatlanayotganini ta’kidlab, ikki mamlakat o‘rtasidagi sport aloqalarini rivojlantirishga faol ko‘maklashgani uchun minnatdorchilik bildirdi. Uchrashuvda so‘nggi yillarda bu sohadagi hamkorlik ishlari ayniqsa samarali bo‘lgani qayd etildi.

Belarus va O‘zbekistonda tashkil etilgan xalqaro musobaqalar hamda mashg‘ulot yig‘inlarida ikki mamlakat sportchilarining ishtiroki har ikki tomon tomonidan yuqori baholandi. Suhbat davomida tomonlar sport an’analarini mustahkamlash va yangi yutuqlarga erishishga qaratilgan hamkorlikni davom ettirish hamda kengaytirishga tayyorliklarini tasdiqlashdi.