O‘zbekistonda ilk bor o‘zbek tilidagi ClimateScience nomli eng yirik xalqaro ta’lim platformasi taqdim etildi. Ushbu loyiha iqlim ta’limini rivojlantirish va yoshlarga keng imkoniyatlar yaratishga qaratilgan. Mazkur tashabbus Ekologiya vazirligi qoshidagi Iqlim o‘zgarishi bo‘yicha Milliy markaz tomonidan ClimateScience bilan hamkorlikda YUNISEFning ko‘magida amalga oshirildi.
28-yanvar kuni Toshkent shahridagi 9-maktabda platformani ta’lim jarayoniga joriy etishga bag‘ishlangan interfaol dars o‘tkazildi. O‘quvchilar ClimateScience imkoniyatlari bilan tanishib, uning resurslaridan foydalanishni o‘rgandilar hamda iqlim o‘zgarishi bo‘yicha kirish kursini o‘tdilar. Dars davomida maktab o‘quvchilari ekologik muammolarni hal qilish bo‘yicha o‘z g‘oyalari bilan o‘rtoqlashdilar va iqlim tashabbuslarida faol ishtirok etish yo‘llarini muhokama qildilar.
Platformaning mahalliylashtirish ishlari haqida ilk bor 2024-yil 11-mart kuni Ekologiya vazirligi qoshidagi iqlim kun tartibiga yoshlarni jalb qilish strategiyasi taqdimotida ma’lum qilindi. Ayni paytda, ClimateScience bilan hamkorlik memorandumi imzolandi. Ta’lim materiallarini o‘zbek va qoraqalpoq tillariga tarjima qilish va moslashtirish ishlari mamlakatning turli hududlaridan kelgan yosh tarjimon-ko‘ngillilar va ekologlar tomonidan platforma rahbari Maykl Beklend, ClimateScience jamoasi, YUNISEF O‘zbekiston va ekoaktivistka Sug‘diyona Xushnudbekova ko‘magida amalga oshirildi.
ClimateScience bepul ilmiy asoslangan materiallarni, jumladan onlayn kurslar, maqolalar va interaktiv testlarni taklif etadi. Bu esa yoshlarga iqlim haqidagi bilimlarini chuqurlashtirish va tanqidiy fikrlashni rivojlantirish imkonini beradi. Shuningdek, platforma o‘qituvchilarga tayyor o‘quv resurslari, taqdimotlar va topshiriqlarni taqdim etib, o‘quv jarayonini soddalashtiradi va yanada qiziqarli qiladi.
Loyihani Kembrij va Oksford universitetlari, Iqlim o‘zgarishi va atrof-muhit bo‘yicha Grenthem instituti, shuningdek, BMT kabi dunyoning yetakchi institutlari qo‘llab-quvvatlamoqda. Platformadan allaqachon butun dunyo bo‘ylab 2,5 milliondan ortiq kishi foydalanmoqda.