Shveysariyaning eBay Marketplace GmbH kompaniyasi 2025-yilda O‘zbekistonda soliq to‘lovchi sifatida ro‘yxatdan o‘tgan birinchi xorijiy internet-kompaniya bo‘ldi. Soliq qo‘mitasi ma’lumotlariga ko‘ra, u 17-yanvar kuni hisobga olingan.

O‘zbekistonda xorijiy IT-kompaniyalarni qo‘shilgan qiymat solig‘i (QQS) to‘lovchisi sifatida ro‘yxatga olish 2020-yil martidan boshlangan. “Google solig‘i” nomi bilan tanilgan ushbu mexanizm mamlakat hududida jismoniy shaxslarga elektron xizmatlar va tovarlarni taqdim etuvchi xorijiy kompaniyalarga tatbiq etiladi. Ro‘yxatdan o‘tishni osonlashtirish maqsadida Soliq qo‘mitasi virtual QQS ofisini yaratdi, bu esa xorijiy yetkazib beruvchilar uchun jarayonni ancha soddalashtiradi.

2024-yilda yangi xorijiy kompaniyalarni ro‘yxatdan o‘tkazish sur’ati sekinlashdi. Soliq hisobiga jami oltita tashkilot turdi, ular orasida Etsy platformasi orqali xizmatlar ko‘rsatuvchi irlandiyalik Etsy Ireland UC, shuningdek, fransuz ekvayring yechimlari provayderi Nexway, britaniyalik Contactpay Solution, DeepL tarjima xizmati, SaySomethingin.com til kurslari agregatori va BAAdagi Global Intellect Service kompaniyalari bor.

Birinchi yarim yillik ma’lumotlariga ko‘ra, xorijiy IT-kompaniyalar tomonidan to‘langan QQSdan tushgan daromad 48,4 milliard so‘mni tashkil etdi. Ushbu mablag‘ning katta qismi — taxminan 85 foizi — uchta texnologiya giganti: Meta, Google va Apple hissasiga to‘g‘ri keldi.