Malayziyaning “Five Petroleum” kompaniyasi O‘zbekistonda avtoyoqilg‘i quyish shoxobchalari tarmog‘ini yaratishga kirishmoqda. Bu haqda “O‘zbekneftgaz” matbuot xizmati ma’lum qildi. Yaqinda o‘tkazilgan muzokaralar davomida kompaniya raisi Bahodir Sidiqov Five Petroleum bosh direktori bilan uchrashdi. Unda Malayziya giganti brendi ostida faoliyat yuritadigan avtoyoqilg‘i quyish shoxobchalari tarmog‘ini ishga tushirish rejalari muhokama qilindi.

Uchrashuv doirasida tomonlar zamonaviy texnologiyalar va xalqaro standartlarni joriy etishga alohida e’tibor qaratdilar. Bu ko‘rsatilayotgan xizmatlar va mahsulotlar sifatini sezilarli darajada oshirishi kutilmoqda. Shuningdek, kompaniyaning mamlakatdagi mavqeini mustahkamlashga ko‘maklashadigan O‘zbekistonning turli hududlarida transport-logistika infratuzilmasini barpo etish imkoniyatlari ham ko‘rib chiqildi.