“Manchester Siti” bosh murabbiyi Pep Gvardiola jamoasi 3:1 hisobida g‘alaba qozongan «Chelsea‘ga qarshi o‘yinda himoyachi Abduqodir Husanovning debyuti haqida fikr bildirdi.

Yosh futbolchi uchun Premer-ligadagi ilk o‘yin oson kechmadi. Ikkinchi daqiqadayoq Husanov raqib jamoaning goliga olib kelgan xatoga yo‘l qo‘ydi va ikki daqiqadan so‘ng Koul Palmerga nisbatan qo‘pol harakati uchun sariq kartochka oldi. Shunga qaramay, u Jeydon Sanchoning zarbasini muhim to‘sib qolish va “Chelsea” darvozasiga zarba berishga urinish bilan o‘z xarakterini ko‘rsatishga ulgurdi. 54-daqiqada Husanov almashtirildi.

Gvardiola yosh futbolchining moslashuvi vaqt talab qilishini ta’kidladi. “Unga oson bo‘lmadi. U o‘yindan oldin atigi bitta mashg‘ulot o‘tkazdi, keyin esa Jekson, Koul, Madueke va Sancho kabi raqiblarga qarshi maydonga tushdi. Bunday vaziyatlar eng yaxshi saboqdir. U albatta o‘rganadi,” — dedi murabbiy.

Husanov uchun qiyinchiliklardan biri til to‘sig‘i bo‘ldi. ‘U ingliz tilida gapirmaydi, shuning uchun men hali u bilan to‘g‘ridan-to‘g‘ri gaplashganim yo‘q. Lekin hammasi joyiga tushadi. U biz bilan endigina mashq qila boshladi. Jarohatdan keyin Jon Stounzning qaytishini, ayniqsa «Bryugge‘ga qarshi bo‘ladigan o‘yinni hisobga olgan holda, shoshirishni xohlamadim,» — deya qo‘shimcha qildi Gvardiola.

Murabbiy, shuningdek, jamoaning yangi o‘yinchiga ko‘rsatgan qo‘llab-quvvatlashini ta’kidladi: “Barcha o‘yinchilar bir tan-u bir jon bo‘ldi, bu juda muhim. Har kim xato qilishi mumkin. Muxlislar har doim yangi o‘yinchilarni qo‘llab-quvvatlaydi. Husanov juda yosh, u albatta o‘rganib oladi.”

Turnir jadvalidagi vaziyat haqida gapirar ekan, Gvardiola jamoa to‘g‘ri yo‘lda ekanini ta’kidladi: «Endi biz «Nottingem“ga yaqinroqmiz, ammo “Bornmut” hozir a’lo formada.»