Farg‘ona viloyati hokimining qurilish, kommunikatsiyalarni rivojlantirish, kommunal xo‘jaligi, ekologiya va ko‘kalamzorlashtirish ishlariga mas’ul yangi o‘rinbosari tayinlandi. Bu lavozimga avvalroq viloyat hokimligi huzuridagi kapital qurilish sohasidagi buyurtmachi xizmatiga rahbarlik qilgan Hakimjon Abdumominovich Dolimov tayinlandi.

Hakimjon Dolimov 1983 yilda Buvayda tumanida tug‘ilgan. 2006 yilda Farg‘ona politexnika institutini tamomlab, faoliyatini Farg‘ona viloyati Iqtisodiyot bosh boshqarmasida boshlagan. Turli yillarda viloyat hokimining sanoat, kommunikatsiyalar va kommunal xo‘jalik masalalari bo‘yicha o‘rinbosari bosh mutaxassisi, boshlig‘ining birinchi o‘rinbosari va kotibiyat mudiri lavozimlarida ishlagan.

Bundan tashqari, Dolimov Iqtisodiy taraqqiyot va kambag‘allikni qisqartirish vazirligining Milliy va hududiy investitsiyalar yo‘nalishlari va loyihalarini shakllantirish boshqarmasida bosh mutaxassis bo‘lib ishlagan. Keyin Farg‘ona viloyati hokimligi huzuridagi “Yagona buyurtmachi xizmati” injiniring kompaniyasiga rahbarlik qilgan.

2021 yildan buyon kapital qurilish sohasida buyurtmachi xizmatiga rahbarlik qilgan. Uning kasb tajribasi va yutuqlari viloyat hokimligidagi yig‘ilishda rasman e’lon qilingan yangi lavozimga tayinlanishida asosiy omil bo‘ldi.