Jahon banki Ijroiya kengashi Markaziy Osiyoda “Yagona salomatlik” mintaqaviy dasturining birinchi bosqichini moliyalashtirish uchun 60 million dollar ajratishni ma’qulladi. Moliyalashtirish Qirg‘iziston Respublikasi uchun 30 million dollarlik imtiyozli kredit va Tojikiston uchun 30 million dollarlik grantni o‘z ichiga oladi. Bundan tashqari, har bir davlat Pandemiya jamg‘armasidan 1,79 million dollar miqdorida grant oladi.

Dastur inson, hayvonlar va atrof-muhit salomatligi uchun ustuvor xavflarni oldini olish, aniqlash va ularga javob berishga qaratilgan. U mintaqaning beshta davlati: Qozog‘iston, Qirg‘iziston, Tojikiston, Turkmaniston va O‘zbekistonni qamrab oladi va 2025-2032 yillar oralig‘ida amalga oshiriladi.

Asosiy yo‘nalishlar orasida veterinariya va sanitariya-epidemiologiya xizmatlarini kuchaytirish, raqamli platformalarni rivojlantirish, mutaxassislar tayyorlash, laboratoriyalarni modernizatsiya qilish, hayvonlarni hisobga olish tizimini yaratish kiradi. Markaziy element CAREC negizida Olmaotada kotibiyati bilan “Yagona salomatlik” masalalari boʻyicha birinchi mintaqaviy muvofiqlashtiruvchi organni yaratish boʻladi.

Mintaqa zoonozlar, mikroblarga qarshi chidamlilik, xavfli oziq-ovqat mahsulotlari, yovvoyi tabiatning migratsiyasi va iqlim o'zgarishining ta'siri kabi muammolarga duch kelmoqda. Dastur mamlakatlarga tahdidlarga samarali javob berish uchun sog'liqni saqlash, qishloq xo'jaligi va atrof-muhit sektorlari o'rtasida sinergiya o'rnatishga yordam beradi.

Jahon bankining Markaziy Osiyo bo‘yicha direktori Tatyana Proskuryakovaning so‘zlariga ko‘ra, yangi dastur “qishloq xo‘jaligi raqobatbardoshligini mustahkamlash, savdoni kengaytirish va yangi ish o‘rinlari yaratishga yordam beradi”.