O‘zbekistonning yirik xususiy banklaridan biri bo‘lgan “Kapitalbank” Germaniyaning Helaba banki bilan 15 million yevro miqdorida ikki tomonlama savdo kreditlash bo‘yicha kelishuv tuzdi. Kelishuvni imzolash 14-15 yanvar kunlari Venada o‘tkazilayotgan Euromoney 2025 xalqaro iqtisodiy forumi doirasida amalga oshirildi.

Kelishuv O‘zbekiston va Germaniya o‘rtasidagi eksport-import operatsiyalarini qo‘llab-quvvatlash va iqtisodiy aloqalarni mustahkamlashga qaratilgan. Hamkorlik doirasida xalqaro savdo loyihalarini amalga oshirish va ikki mamlakat biznesini rivojlantirish uchun kredit mablag‘laridan foydalanish imkoniyati yaratiladi.

“Kapitalbank” boshqaruvi raisining birinchi o‘rinbosari Sardor Ismailov shunday dedi: “Ushbu kelishuvning imzolanishi xalqaro moliya institutlarining bankimizga bo‘lgan ishonchi yuqori ekanligidan dalolat beradi. Ishonchimiz komilki, Helaba bilan hamkorligimiz mijozlarimizning tashqi iqtisodiy faoliyati uchun yangi imkoniyatlar yaratadi va xalqaro savdoni rivojlantirishga salmoqli hissa qo‘shadi.”