London Qirollik kollejida Markaziy Osiyo yoshlarining birinchi sammiti bo‘lib o‘tdi. O‘zbekistonning Buyuk Britaniyadagi elchixonasi va O‘zbekiston talabalar uyushmasi ko‘magida tashkil etilgan tadbir mintaqaning besh mamlakatidan kelgan yoshlarni bir joyga to‘pladi.

Sammitning asosiy natijasi madaniyat, ta’lim va boshqa muhim yo‘nalishlarda muloqot maydoni bo‘lib xizmat qiladigan “Markaziy Osiyo yoshlar ittifoqi” platformasining ishga tushirilishi bo‘ldi. Ushbu ittifoq yoshlar hamkorligi va rivojlanishi uchun yangi imkoniyatlar yaratadi.

Uchrashuvda muhim tashabbuslar, xususan, O‘zbekiston Prezidentining Markaziy Osiyoda yoshlarni qo‘llab-quvvatlash bo‘yicha BMT Ishchi guruhini tashkil etish haqidagi taklifi muhokama qilindi. Bu g‘oya mintaqaning barqarorligi va innovatsion taraqqiyoti uchun muhim qadam sifatida ijobiy baholandi.

Sammit doirasida ta’lim, sport va diplomatiya masalalariga bag‘ishlangan ekspertlar ishtirokidagi panel munozaralar o‘tkazildi. Yoshlar siyosati sohasida akademik almashinuv va qo‘shma loyihalar istiqbollariga alohida e’tibor qaratildi.

Tadbir yakunida Markaziy Osiyo yoshlar harakati yetakchilarini 2025-yil may oyida O‘zbekistonda bo‘lib o‘tadigan Butunjahon yoshlar festivali dasturiga kiritish to‘g‘risida qaror qabul qilindi.