Mobiuz’ning 100% aksiyalarini sotish bo‘yicha tender iyun oyida e’lon qilingan edi. Arizalarni qabul qilishning oxirgi muddati – 1 avgust.

Rothschild & Co moliyaviy va strategik maslahatchi sifatida ishlaydi. Davlat aktivlarini boshqarish agentligi vakillari izoh berishdan bosh tortdilar. Operatorning sotilishi Prezident Shavkat Mirziyoyev tomonidan boshlangan keng ko‘lamli xususiylashtirish dasturining bir qismidir. Birgina 2025-yilning o‘zida hokimiyat davlat aksiyalarini sotishdan kamida 10 trillion so‘m (786 million dollarga yaqin) daromad olishni rejalashtirgan. Umuman olganda, 2026 yil oxiriga qadar 29 ta yirik davlat kompaniyasi, jumladan, telekommunikatsiya va energetika sohalaridagi korxonalarning ulushlari xususiy qo‘llarga o‘tishi kerak. Agentlik ma’lumotlariga ko‘ra, Mobiuz’ning 2024 yildagi daromadi 164 million dollarni, EBITDA – 41 million dollarni tashkil qilgan. Kompaniyaning asosiy raqobatchilari “Uztelekom” davlat kompaniyasi, shuningdek, “Veon Ltd” xalqaro guruhiga tegishli Ucell (Coscom) va Beeline (Unitel) kompaniyalaridir. Veon Bloomberg so‘roviga javoban tenderda ishtirok etish ehtimoli haqida izoh berishdan bosh tortdi, biroq u organik va noorganik rivojlanish yo‘llarini ko‘rib chiqayotganini va O‘zbekistonni asosiy bozor deb bilishini aytdi. Mobiuz 2014-yilda Uzdunrobita aktivlari asosida MTS va Radioaloqa, radioeshittirish va televideniye markazi qo‘shma korxonasi sifatida yaratilgan. 2016 yilda MTS loyihadan chiqdi va 2018 yildan boshlab 100% aktsiyalari Digital Trust davlat fondiga tegishli. 2019-yilda brend Mobiuz deb o‘zgartirildi. Operatorni xususiylashtirish rejalari 2020 yildan beri muhokama qilinmoqda. Muddatlar bir necha marta, oxirgi marta prezidentning 2025 yil apreldagi farmonida keyinga surilgan.