“Navoiy kon-metallurgiya kombinati” aksiyadorlik jamiyatiga ilk bor “Sustainable Fitch” xalqaro agentligi tomonidan korporativ ESG reytingi berildi. Kombinat 1 dan 5 gacha bo‘lgan shkalada 3 baho oldi, bunda 1 — xavf darajasi past, 5 esa — yuqori hisoblanadi. Umumiy ball 100 balldan 51 ni tashkil etdi.

Agentlik NKMKning ekologik va ijtimoiy ko‘rsatkichlarini ijobiy baholab, sezilarli ekologik xavf-xatarlarning yo‘qligini, chiqindilar va suv iste’molini boshqarishning samarali tizimlari mavjudligini, shuningdek, mehnatga haq to‘lashda jinslar o‘rtasidagi farq minimal ekanligini ta’kidladi.

Ekspertlar kombinatning korporativ boshqaruvini 2-darajada baholab, xalqaro standartlar bo‘yicha moliyaviy hisobotlarni yuritish, muntazam ichki audit o‘tkazish va xatarlarni samarali boshqarish kabi kuchli tomonlarini alohida qayd etishdi. Ushbu omillar korxonaning yakuniy bahosida hal qiluvchi rol o‘ynadi.