Markaziy harbiy okrugning Navoiy garnizonida harbiy xizmatchilar va ularning oila a’zolari uchun dolzarb ijtimoiy masalalarni hal etishga qaratilgan sayyor qabul o‘tkazildi. Tadbirda okrug qo‘mondonligi, Navoiy viloyati Harbiy prokuraturasi, tegishli vazirlik va idoralarning hududiy bo‘linmalari vakillari, shuningdek, faxriylar va qism shaxsiy tarkibi ishtirok etdi.

Murojaatlarning asosiy mavzulari uy-joy bilan ta’minlash, xizmat vazifalarini bajarish paytida jarohatlangan yoki halok bo‘lgan harbiy xizmatchilarning oilalarini qo‘llab-quvvatlash, oilaviy vaziyatlarga ko‘ra xizmat joyini o‘zgartirish va nafaqaxo‘rlar uchun maxsus dasturlar ishlab chiqish masalalari bo‘ldi. Murojaatlar ham individual, ham ommaviy tarzda ko‘rib chiqildi.

Ba’zi muammolarni bevosita joyning o‘zida hal etishga erishildi. Qolgan so‘rovlar tegishli tashkilotlarga yuborildi va keyingi ko‘rib chiqish uchun qat’iy nazoratga olindi.