“Navoiyuran” davlat korxonasi 2024-yildagi faoliyati yakunlarini sarhisob qilib, ishlab chiqarish va iqtisodiy sohada sezilarli yutuqlarga erishganini ko‘rsatdi. O‘tgan yili korxona 13,7 trillion so‘mlik tovar mahsuloti ishlab chiqardi, bu rasmiy kurs bo‘yicha 1,06 milliard dollarga teng. 2023-yilga nisbatan o‘sish sur’ati 28,1 foizni tashkil etib, ishlab chiqarish hajmi so‘m hisobida ikki barobardan ko‘proqqa — 6,7 trillion so‘mdan 13,7 trillion so‘mgacha oshdi.

Korxonaning investitsiyalari ham sezilarli darajada o‘sdi. “Navoiyuran” o‘z investitsiya dasturi doirasida mablag‘larni o‘zlashtirish hajmini ikki barobarga oshirib, 125,9 million dollarga yetkazdi. Xarajatlarni optimallashtirish bo‘yicha kompleks chora-tadbirlar natijasida mahsulot tannarxini 457,2 milliard so‘mga pasaytirishga erishildi.

Korxona mahalliylashtirish dasturida ham faol ishtirok etib, 58,7 milliard so‘mlik mahsulot ishlab chiqardi, bu o‘tgan yilga nisbatan 32,1 foiz ko‘pdir. Natijada 122 ta yangi ish o‘rni yaratildi, bu esa mintaqa iqtisodiyotini rivojlantirishga xizmat qilmoqda.

Bundan tashqari, “Navoiyuran” byudjetga 4,6 trillion so‘m to‘lab, O‘zbekistonning eng yirik soliq to‘lovchilari orasida uchinchi o‘rinni egalladi. Bu ko‘rsatkich 2023-yilning shu davriga (2,6 trillion so‘m) nisbatan ikki baravar ko‘pdir. Birinchi ikki o‘rinda an’anaviy ravishda NKMK va OKMK joylashgan bo‘lib, ular birgalikda barcha soliq tushumlarining 23 foizini tashkil etadi.

2024-yilda korxona jahon uran bozorida o‘z mavqeyini mustahkamlashni davom ettirdi. 2023-yil yakunlariga ko‘ra, O‘zbekistonda uran konsentrati ishlab chiqarish 11 foizga oshib, 6,7 trillion so‘mga (600 million dollar) yetdi. Hozirgi vaqtda “Navoiyuran” uran qazib olish bo‘yicha dunyoda oltinchi o‘rinni egallab, 3,8 ming tonnadan ortiq hajm bilan dunyo ishlab chiqarishining 7 foizini ta’minlamoqda.

Korxona, shuningdek, 2024-yilda sakkizta loyihaga 145 million dollar sarmoya kiritishni rejalashtirmoqda, shundan 50 million dollari xorijiy investorlardan jalb qilinadi.