2024-yilda O‘zbekistonda ishlab chiqarilgan tovarlarning Wildberries platformasi orqali sotilishi 60 foizdan ko‘proqqa oshdi. Bunday o‘sish mahalliy mahsulotlarning yuqori raqobatbardoshligi va xalqaro bozorlardagi ommaviyligi haqida dalolat beradi.

Sezilarli savdo o‘sishi Rossiya, Belarus, Qozog‘iston va Qirg‘izistonda qayd etildi. Dinamika bo‘yicha yetakchi Rossiya bo‘ldi: u yerda uy-ro‘zg‘or uchun to‘qimachilik mahsulotlariga bo‘lgan talab 66 foizga, O‘zbekistonda ishlab chiqarilgan oziq-ovqat mahsulotlariga bo‘lgan talab esa qariyb ikki baravarga ko‘paydi. Belarusda avtomobil tovarlari savdosi besh barobarga o‘sdi, kiyim-kechak va o‘yinchoqlarga bo‘lgan talab esa 100 foizdan ziyod oshdi. Qozog‘iston va Qirg‘iziston avtomobil tovarlari, kiyim-kechak va to‘qimachilik mahsulotlariga yuqori qiziqish ko‘rsatdi, bu yerda o‘sish 71 foizdan 175 foizgacha bo‘ldi.

To‘qimachilik mahsulotlari o‘zining ommabopligi va sifatini tasdiqlagan holda asosiy eksport toifasi bo‘lib qolmoqda. Biroq, avtomobil tovarlari, sport kiyimlari, oziq-ovqat va bolalar mahsulotlari savdosining jadal rivojlanishi O‘zbekistonning eksport salohiyatini muvaffaqiyatli ravishda diversifikatsiya qilayotganidan darak beradi.