Pokiston Savdo-sanoat palatalari Federatsiyasida O‘zbekiston elchisi Alisher To‘xtayev va Savdo-sanoat palatasi raisi Davron Vahobov boshchiligidagi delegatsiya ishtirokida biznes-forum o‘tkazildi. Bu haqda “Dunyo” axborot agentligi xabar bermoqda. G2B va B2B formatidagi muzokaralarda ikki mamlakat tadbirkorlarining 100 dan ortiq vakili ishtirok etdi.

Federatsiya raisi Atif Shayx Ikrom tadbirkorlar o‘rtasidagi hamkorlik davlatlarning savdo-iqtisodiy munosabatlarida yangi sahifa ochishini ta’kidladi. U xususiy va davlat sektorlari o‘rtasidagi muloqotni mustahkamlash savdo uchun qulay shart-sharoitlar yaratishga, investitsiya muhitini yaxshilashga va strategik sheriklikni mustahkamlashga xizmat qilishini alohida qayd etdi.

Forum davomida to‘qimachilik, charm va jun sanoati, qurilish materiallari, logistika va farmatsevtika sohalarida hamkorlik qilish bo‘yicha kelishuvlarga erishildi. Shuningdek, O‘zbekiston mahsulotlari eksportini ko‘paytirishga yordam beradigan «Savdo vakillari ofisi‘ni Lahor va Karachida tashkil etish to‘g‘risida qaror qabul qilindi.

Davron Vahobov pokistonlik tadbirkorlarni 11-13 fevral kunlari Lahorda bo‘lib o‘tadigan “Made in Uzbekistan” ko‘rgazmasiga taklif etdi. Tadbir doirasida hamkorlikning yangi istiqbollarini muhokama qilish uchun O‘zbekiston biznes vakillari bilan uchrashuvlar o‘tkazilishi rejalashtirilgan.