Bangkok shahrida (Tailand) davom etayotgan dzyudo bo‘yicha qit’a chempionati doirasida Osiyo dzyudo ittifoqining yig‘ilishi bo‘lib o‘tdi va unda O‘zbekiston dzyudo federatsiyasi raisi Aziz Komilov tashkilotning strategik rivojlanish va marketing bo‘yicha vitse-prezidenti lavozimiga saylandi. Osiyo dzyudosida O‘zbekiston vakilining bunday yuksak lavozimga saylanishi mamlakatimizning ushbu sport turini qit’ada rivojlantirishga qo‘shgan hissasi e’tirof etilganidan dalolatdir. Bundan tashqari, 26 aprel kuni erkaklar o‘rtasida 73 kilogrammgacha va 81 kilogrammgacha bo‘lgan vazn toifalarida, shuningdek, ayollar o‘rtasida 57 kilogrammgacha, 63 kilogrammgacha va 70 kilogrammgacha bo‘lgan vazn toifalarida bellashuvlar o‘tkazilayotgan Osiyo chempionatida beshta vazn toifasida O‘zbekiston terma jamoasining yetti nafar vakili tatamiga chiqdi. Eslatib o‘tamiz, avvalroq xuddi shu Osiyo chempionati doirasida o‘zbekistonlik dzyudochi Zamaxshari Bekmurodov 66 kilogramm vazn toifasida kumush medalni qo‘lga kiritgan edi. Qit’a chempionatida 23 davlatdan 220 nafar sportchi ishtirok etmoqda.