Shavkat Mirziyoyev gaz sohasi joriy holati va samaradorligini oshirish chora-tadbirlariga bag‘ishlangan yig‘ilish o‘tkazdi. Uchrashuvda “O‘zbekneftgaz” aksiyadorlik jamiyati raisi bir yillik ish natijalari bo‘yicha hisobot berdi va 2025-yilga mo‘ljallangan rejalarni belgilab berdi.

Yig‘ilishda gaz qazib olish hajmini barqarorlashtirish uchun xorijiy kompaniyalar jalb etilayotgani ta’kidlandi. Ular ishtirokida yangi quduqlarni burg‘ulash va mavjudlarini zamonaviy texnologiyalardan foydalanib modernizatsiya qilish rejalashtirilgan.

O‘tgan yillarda geologik qidiruv ishlariga yetarli e’tibor berilmagani soha asosiy muammosi sifatida ko‘rsatib o‘tildi. Bu esa bir qator konlarning holdan toyishiga va ularning samaradorligi pasayishiga olib keldi. Ushbu muammoni hal qilish uchun yangi texnologiyalarni joriy etish va 15 ta istiqbolli hududda qidiruv ishlari olib borish ko‘zda tutilgan. Seysmik qidiruv maydoni 6,5 ming kvadrat kilometrgacha kengaytiriladi.

Prezident xorijiy kompaniyalar va mutaxassislarni jalb qilgan holda, geologiya va konlarni o‘zlashtirish dasturini ishlab chiqish bo‘yicha topshiriq berdi. Shuningdek, ‘O‘zbekneftgaz»da mahsulot tannarxini pasaytirish va xalqaro kredit reytingini yaxshilashga qaratilgan islohotlar davom ettiriladi.

Kelgusi yilda yangi loyihalar va geologik qidiruv ishlarini moliyalashtirish uchun xalqaro investitsiyalarni jalb qilish rejalashtirilmoqda. Kadrlar tayyorlash, xususan, ta’lim sifatini oshirish, shuningdek, xorijda mehnat qilayotgan vatandoshlarimiz orasidan malakali mutaxassislarni jalb etishga alohida e’tibor qaratiladi.