O‘zbekistonda vazirliklar va sanoat tarmoqlari mahalliy elektrotexnika ishlab chiqaruvchilaridan uskunalar xarid qilishni boshlaydi. Sohani rag‘batlantirish va uning salohiyatini kengaytirish maqsadida umumiy qiymati 4 milliard dollarlik 290 ta yangi loyihani ishga tushirish, 600 million dollarlik investitsiyalarni o‘zlashtirish rejalashtirilmoqda. “O‘zeltexsanoat” uyushmasi raisi Mirziyod Yunusov ma’lum qilishicha, misni qayta ishlash darajasini 75 foizga yetkazish ko‘zda tutilgan.

Mahalliylashtirish dasturi doirasida 75 milliard dollarlik investitsiya loyihalari amalga oshiriladi, shundan 28 milliard dollari mahalliy tarkibiy qism ulushiga to‘g‘ri keladi. Elektrotexnika klasterini qo‘llab-quvvatlash uchun Ohangaron (200 gektar), Farg‘ona (10 gektar) va Urganch (4 gektar) shaharlarida yer maydonlari ajratilgan. Ularning infratuzilmasiga 181 million so‘m yo‘naltirilgan. Endi tadbirkorlar texnoparklarda tayyor binolar qurib, ularni elektrotexnika va turdosh tarmoqlar korxonalariga sotish imkoniyatiga ega bo‘ladi.

Biznes uchun qulay shart-sharoitlar yaratishga alohida e’tibor qaratilmoqda: yuqori texnologiyali ishlab chiqarishni joriy etayotgan kompaniyalar uch yil davomida foyda solig‘i va mol-mulk solig‘idan ozod etiladi. Ushbu chora-tadbirlar Ohangaron mis klasterida 68 million dollarlik, Qashqadaryo, Farg‘ona va Urganch kabi boshqa hududlarda 30 million dollarlik tashabbuslarni o‘z ichiga olgan yangi loyihalarni ishga tushirish imkonini beradi.

Bundan tashqari, mahalliy ishlab chiqaruvchilar mahsulotlarini sotish uchun 15 trillion so‘mlik kafolatlangan bozor yaratilmoqda. Ijtimoiy obyektlar uchun qayta tiklanuvchi energiya uskunalarini o‘zbek kompaniyalaridan xarid qilish tartibi ishlab chiqilmoqda.