O‘zbekiston Markaziy banki 2025-yil 17-yanvardan boshlab 100 gramm og‘irlikdagi oltin quymalarini muomalaga kiritadi, shu orqali investitsiya mahsulotlari turlarini kengaytiradi. Ilgari bozorda 5, 10, 20 va 50 grammlik quymalar mavjud edi.

Har bir quyma maxsus himoyalangan qadog‘da yetkazib beriladi. Bu qadog‘ bir vaqtning o‘zida sertifikat vazifasini bajaradi va o‘ziga xos seriya raqamiga ega bo‘ladi. Milliy valyutadagi oltin narxlari har kuni yangilanib, Markaziy bankning rasmiy veb-saytida e’lon qilinadi.

Quymalarni ularning asl qadog‘i saqlangan holda erkin sotish va mamlakatdan tashqariga olib chiqish mumkin. Qayta sotib olish uchun qulay shart-sharoitlar yaratilgan: tijorat banklari quymalarni bevosita sotish nuqtalarida sotib oladi. Agar qadog‘ shikastlangan bo‘lsa, texnik ekspertiza o‘tkaziladi va shundan so‘ng to‘lov amalga oshiriladi.