O‘zbekiston Markaziy banki tijorat banklarining kredit portfelidagi mikrokreditlar va kredit kartalar ulushiga yangi cheklovlar kiritmoqda. Regulyatorning 22 apreldagi qaroriga muvofiq, mikrokreditlar (mikromoliyaviy banklar bundan mustasno) va kredit kartalari (overdraft) ulushi bank umumiy kredit portfelidagi 25 foizdan oshmasligi kerak. Ushbu qaror makroprudensial vositalar samaradorligini oshirish va mamlakat bank tizimining barqarorligini ta'minlash maqsadida qabul qilindi. Joriy ko‘rsatkichlari belgilangan limitdan oshib ketgan banklarga Markaziy bank bilan kelishilgan holda ushbu turdagi kreditlar kontsentratsiyasini bosqichma-bosqich kamaytirish uchun 2029-yil 1-yanvarga qadar muddat berildi. 2025-yil fevral holatiga ko‘ra, O‘zbekistondagi beshta bankning mikrokreditlar ulushi 25 foizdan oshdi, ulardan uchtasi bozorning yangi ishtirokchilaridir. Regulyator ularning kredit portfeli o‘sishi bilan bu ko‘rsatkich kamayishini kutmoqda. Markaziy bankning taʼkidlashicha, talablarning kuchaytirilishi avvalroq Fitch Ratings va Xalqaro valyuta jamgʻarmasi ekspertlari tomonidan maʼlum qilingan chakana kreditlash bozorida qizib ketish xavfi hisobga olingan. XVJ, xususan, Markaziy bankka ushbu sohada nazoratni kuchaytirishni tavsiya qildi.