1997-yildan beri O‘zbekiston sport kurashi assotsiatsiyasiga rahbarlik qilib kelgan Salim Abduvaliyev raislik lavozimini tark etdi. U o‘zining uzoq faoliyati davomida 2017-yildan-2023-yilgacha Milliy olimpiya qo‘mitasi (MOQ) raisining o‘rinbosari lavozimida ham ishlagan edi.

14-yanvar kuni bo‘lib o‘tgan navbatdan tashqari hisobot-saylov anjumanida Bosh prokuror Nig‘matilla Yo‘ldoshev uyushmaning yangi raisi etib saylandi. U 2019-yil oktyabr oyidan beri Kurash federatsiyasini boshqarib kelayotgan bo‘lib, 2024-yil avgustda ushbu lavozimga qayta saylangan edi. Sport vaziri Adham Ikromov tayinlovga izoh berar ekan, Yo‘ldoshevning sport boshqaruvidagi boy tajribasi O‘zbekistonda kurashni rivojlantirish uchun mustahkam poydevor bo‘lishini ta’kidladi.

Anjumanda sport vaziri Adham Ikromov, bosh prokurorning birinchi o‘rinbosari Bahriddin Valiyev, Otabek Umarov boshchiligidagi MOQ rahbariyati hamda terma jamoa murabbiylar shtabi ishtirok etdi.

Eslatib o‘tamiz, 2024-yil noyabr oyida prezident Shavkat Mirziyoyev MOQ raisi etib saylangandi, Otabek Umarov esa uning birinchi o‘rinbosari bo‘lgan edi. Oybek Qosimov qo‘mita bosh kotibi lavozimida qoldi, Sherzod Toshmatov esa rais o‘rinbosari etib tayinlandi.