Bokuda Turkiy davlatlar tashkiloti (TDT) a’zo mamlakatlarining bojxona boshqarmalari rahbarlari yig‘ilishi bo‘lib o‘tdi. Unda O‘zbekiston, Qirg‘iziston, Qozog‘iston, Ozarbayjon va Turkiya vakillari qatnashdi. Asosiy e’tibor mintaqada bojxona tartib-qoidalarini zamonaviylashtirishga va soddalashtirish masalalariga qaratildi.

Uchrashuvda soddalashtirilgan bojxona yo‘lagi orqali tranzitni tezlashtirish mexanizmlari, shuningdek, bojxona rasmiylashtiruvi samaradorligini oshirishga mo‘ljallangan Transkaspiy portalini rivojlantirish masalalari muhokama qilindi. Mamlakat vakillari biznes va bojxona xizmatlari o‘rtasidagi hamkorlikni mustahkamlaydigan vakolatli iqtisodiy operatorlarning (VIO) yagona dasturini yaratish bo‘yicha kelishuvga erishdilar.

Yig‘ilishning o‘ziga xos jihati xalqaro hamkorlarning, jumladan Gruziya Bojxona departamenti, BMT Yevropa iqtisodiy komissiyasi, Xalqaro avtomobil transporti ittifoqi (IRU) hamda Vengriya Milliy soliq va bojxona boshqarmasi vakillarining ishtiroki bo‘ldi.

Uchrashuvda shaffoflik va nazoratni kuchaytiruvchi elektron plombalar (e-plombalar) kabi innovatsiyalarni joriy etish qo‘llab-quvvatlandi, shuningdek, chegaralarni kesib o‘tishni tezlashtirish choralari kelishib olindi. “Yagona to‘xtash” va “Yagona darcha” tizimlarining joriy etilishi muhim qadamlar sifatida baholandi.

Majlis 1975-yilgi XYT konvensiyasi doirasida tranzitni soddalashtirish maqsadida eTIR bo‘yicha Yo‘l xaritasini imzolash bilan yakunlandi.