Vashingtonda AQSH Savdo palatasi bilan hamkorlikda uyushtirilgan davra suhbati bo‘lib o‘tdi. Unda Marriott International, Citi, British Petroleum va boshqa yetakchi transmilliy kompaniyalar vakillari ishtirok etdi. Uchrashuvning asosiy mavzusi iqtisodiy aloqalarni mustahkamlash va muhim tarmoqlarda hamkorlikni rivojlantirish masalalari bo‘ldi.

Muhokamalarning eng muhim natijalaridan biri Amerika kompaniyalari delegatsiyasining yilning birinchi yarmida O‘zbekistonga tashrif buyurishi haqidagi kelishuv bo‘ldi. AQSH Savdo palatasi katta vitse-prezidenti Xush Choksi 20 ga yaqin kompaniya savdo-investitsiya loyihalari bo‘yicha muzokaralar o‘tkazishni rejalashtirayotganini aytib, Amerika tomonining ishbilarmonlik aloqalarini rivojlantirishni qo‘llab-quvvatlashga va investitsiyalarni jalb qilish uchun sharoit yaratishga tayyor ekanligini ta’kidladi.

O‘zbekistonning JSTga a’zo bo‘lishi bo‘yicha ikki tomonlama muzokaralarning yakunlanishiga alohida e’tibor qaratildi. Uchrashuv ishtirokchilari ushbu voqeani yuqori baholab, uning xalqaro aloqalarni mustahkamlash va xorijiy investorlar uchun imkoniyatlarni kengaytirishdagi ahamiyatini qayd etdilar.

Uchrashuv doirasida tog‘-kon sanoati, axborot texnologiyalari, qishloq xo‘jaligi, qurilish, infratuzilma va mashinasozlik kabi sohalardagi hamkorlik istiqbollari muhokama qilindi. Shuningdek, B2B muzokaralari ham o‘tkazilib, unda aniq loyihalar va ularni amalga oshirish yo‘llari haqida fikr almashildi.

1912-yilda tashkil etilgan AQSH Savdo palatasi dunyoning eng yirik biznes federatsiyasi hisoblanadi. U uch millionga yaqin kompaniya va 100 dan ortiq chet eldagi savdo palatalarini o‘z safiga birlashtirgan. Palata rahbariyati O‘zbekiston bilan iqtisodiy hamkorlikni rivojlantirishga ko‘maklashuvchi loyihalarni qo‘llab-quvvatlash niyatini tasdiqladi.