Toshkentda O‘zbekiston iqtisodiyot va moliya vaziri o‘rinbosari Ilhom Umrzoqov Turkiyaning “Calik Energy” kompaniyasi rahbariyati bilan uchrashdi. Mamlakat energetika infratuzilmasini modernizatsiya qilish istiqbollari, shuningdek, davlat-xususiy sheriklik (DXSH) mexanizmi orqali xususiy sarmoyalarni jalb etish imkoniyatlari ko‘rib chiqildi.

Uchrashuvda “Calik Energy” direktorlar kengashi raisining o‘rinbosari Hasan Yasir Bora, moliyaviy masalalar bo‘yicha direktor Eren Kingerlioglu hamda vazirlik vakillari ishtirok etdilar. Turkiya kompaniyasi vakillari O‘zbekistonning turli hududlaridagi loyihalarni batafsil tahlil qilishga va energetika sohasini rivojlantirish uchun samarali yechimlar taklif etishga tayyorliklarini bildirdilar.

“Calik Energy” — Turkiyaning “Calik Holding” tarkibiga kiruvchi va 1998-yildan beri energetika sohasida faoliyat yuritib kelayotgan yetakchi kompaniyasidir. U yirik infratuzilma loyihalarini loyihalash va amalga oshirishga ixtisoslashgan.