MEDEF International vakili Klod Imoven boshchiligidagi Fransiya delegatsiyasi O‘zbekiston Bosh vaziri o‘rinbosari Jamshid Qo‘chqorov bilan uchrashdi. Muzokaralar jarayonida Fransiyaning Airbus, TotalEnergies, Veolia, Alstom va Societe Generale kabi yirik kompaniyalari vakillari ham ishtirok etdi.

Asosiy e’tibor “yashil” energetika, transport infratuzilmasini modernizatsiya qilish, qishloq xo‘jaligi va xususiy sektorni qo‘llab-quvvatlash sohalaridagi hamkorlikka qaratildi. Fransiya O‘zbekistonni, ayniqsa, smartfonlar, shamol turbinalari va elektromobillar uchun akkumulyatorlar ishlab chiqarishda foydalaniladigan muhim minerallarni qazib olishda strategik hamkor sifatida ko‘rmoqda. G‘arblik investorlar bu hamkorlik Xitoyga qaramlikni kamaytirishi va barqaror energetikaga o‘tishni tezlashtirishi mumkinligiga umid qilmoqda.

Biroq, Yevropada yashil energiyani joriy etishning noaniq tajribasini hisobga olgan holda, yashil energiyaning istiqbollari haqida savollar tug‘ilmoqda. Shiddatli rejalarga qaramay, ushbu texnologiyalar an’anaviy energiya manbalariga to‘laqonli muqobil sifatida hali o‘z samaradorligini isbotlay olmadi. AQSH yangi prezidentining ushbu yo‘nalishdagi qator tashabbuslardan voz kechish to‘g‘risidagi qarori ularning iqtisodiy jihatdan maqsadga muvofiqligiga bo‘lgan shubhalarni yanada kuchaytirmoqda.