Migratsiya agentligi direktori Behzod Musayev va tashqi ishlar vaziri o‘rinbosari Olimjon Abdullayev boshchiligidagi O‘zbekiston delegatsiyasi Qatarga amaliy tashrif bilan keldi. Qatar idoralari vakillari bilan uchrashuvlarda mehnat migratsiyasiga ko‘maklashish bo‘yicha muhim kelishuvlarga erishildi.

Qatar o‘zbekistonlik mutaxassislar uchun ishchi vizalarini rasmiylashtirishni soddalashtirishga tayyorligini bildirdi. Qatar Ichki ishlar vazirligi va boshqa tuzilmalar vakillari o‘zbekistonlik ishchilar sonini, ayniqsa, sog‘liqni saqlash, neft-gaz sanoati, mehmonxona biznesi va xizmatlar kabi sohalarda ko‘paytirishdan manfaatdor ekanini ta’kidladi.

Tashrif davomida Qatar Mehnat vaziri o‘rinbosari shayx Najva binti Abdurahmon Ol Soniy, shuningdek, Qatar Tashqi ishlar vazirligi Konsullik departamenti direktori Muhammad bin Abdulla As-Subay va Ichki ishlar vazirligi Migratsiya xizmati rahbari general Muhammad bin Ahmad Ad-Dusariy bilan muzokaralar o‘tkazildi. Asosiy e’tibor viza tartib-taomillarini soddalashtirish, ish o‘rinlarini taqdim etish va mehnat migrantlarining huquqlarini himoya qilishga qaratildi.