O‘zbekiston oliy ta’lim vaziri o‘rinbosari Otabek Mahkamov Rossiya fan va oliy ta’lim vaziri o‘rinbosari Konstantin Mogilyovskiy bilan uchrashuv o‘tkazdi. Uchrashuvning asosiy mavzusi Rossiyaning O‘zbekistondagi universitet filiallarini rivojlantirish bo‘ldi.

Tomonlar ushbu filiallarning moddiy-texnik bazasini yaxshilash, ehtiyojlarga muvofiq yangi ta’lim yo‘nalishlarini yaratish, shuningdek, bir qator qo‘shma ta’lim loyihalarini amalga oshirish masalalarini muhokama qildilar.

Mamlakatda Rossiya oliy ta’lim muassasalari filiallari faoliyati darajasini oshirishga qaratilgan mavjud ‘yo‘l xaritalari»ni amalga oshirishga alohida e’tibor qaratildi. Muhokama yakunlari bo‘yicha tomonlar dolzarb masalalarni hal etish bo‘yicha birgalikda ishlashga kelishib oldilar.

Uchrashuvda O‘zbekistonda Bauman nomidagi Moskva davlat texnika universiteti filialini tashkil etish haqida ham so‘z yuritildi. Muhandislik fanlariga qiziquvchi iqtidorli yoshlarni izlab topish va qo‘llab-quvvatlash, ulardan yuqori malakali mutaxassislar tayyorlash bilan bog‘liq ushbu universitet loyihalarini amalga oshirish imkoniyatlari muhokama qilindi.