O‘zbekiston Bosh vaziri o‘rinbosari — Iqtisodiyot va moliya vaziri Jamshid Qo‘chqorov Turkiyaning “BATTAL Holding” xoldingi bosh direktori Mehmet Berat Battal bilan uchrashdi. 27-yanvar kuni bo‘lib o‘tgan muzokaralarda asosiy e’tibor farmatsevtika sohasida sheriklik aloqalarini rivojlantirish va xalqaro tajribani o‘rganishga qaratildi.

1958 yilda Istanbulda tashkil etilgan BATTAL Holding tarkibiga zardoblar, vaksinalar, antibiotiklar va boshqa tibbiy mahsulotlar ishlab chiqarishga ixtisoslashgan Turk ilac ve serum sanai A.S. kompaniyasi kiradi. 2022-yilda xoldingning yillik daromadi 200 million AQSH dollarini tashkil etgan bo‘lib, mahsulot eksporti 30 dan ortiq mamlakatni qamrab olgan.

Uchrashuvda O‘zbekistonda dori vositalarini ishlab chiqarishni mahalliylashtirish, zamonaviy texnologiyalarni joriy etish va yangi farmatsevtika loyihalarini yaratish istiqbollari muhokama qilindi. Mamlakatda sog‘liqni saqlash tizimini modernizatsiya qilish masalalariga alohida e’tibor berildi.

Muzokaralarning asosiy natijalaridan biri BATTAL Holding va O‘zbekiston farmatsevtika tarmog‘ini rivojlantirish agentligi o‘rtasida o‘zaro anglashuv Memorandumining imzolanishi bo‘ldi. Hujjatda parenteral dori vositalarini ishlab chiqarish loyihasini amalga oshirish rejalari belgilandi. Dastlabki hisob-kitoblarga ko‘ra, loyihaga 30 million dollar miqdorida sarmoya kiritiladi, 500 ta yangi ish o‘rni yaratiladi va yiliga 80 million dona mahsulot ishlab chiqariladi.