27-yanvar kuni O‘zbekiston Prezidenti Shavkat Mirziyoyev O‘zbekiston-Turkmaniston siyosiy maslahatlashuvlarida ishtirok etish uchun Toshkentga tashrif buyurgan Turkmaniston Vazirlar Mahkamasi Raisi o‘rinbosari va Tashqi ishlar vaziri Rashid Meredov bilan uchrashdi.

Suhbat davomida Rashid Meredov davlatimiz rahbariga Turkmaniston Prezidenti Serdar Berdimuhamedov va turkman xalqining Milliy yetakchisi Gurbanguli Berdimuhamedovning samimiy salomi va ezgu tilaklarini yetkazdi.

Ikki mamlakat o‘rtasidagi strategik sheriklikni yanada mustahkamlashning asosiy yo‘nalishlari muhokama etildi. Tovar ayirboshlash hajmi 2024-yilda 1,1 milliard dollardan oshgani alohida ta’kidlandi. Shuningdek, “Shovot-Dashog‘uz” chegaraoldi savdo hududi faol barpo etilmoqda, sanoat, energetika, transport, qishloq xo‘jaligi va suv resurslaridan foydalanish sohalarida hamkorlik rivojlanmoqda.

Madaniy almashinuvga alohida e’tibor qaratildi. Turkmaniston tomoni Gurbanguli Berdimuhamedovning “Hakyda go‘wheri” (“Aql durdonasi”) nomli kitobining o‘zbek tilidagi nashrini Toshkentda taqdim etilgani uchun minnatdorchilik bildirdi.

Uchrashuvda, shuningdek, bo‘lajak oliy darajadagi tashriflar va mintaqaviy sammitlarga, jumladan “Markaziy Osiyo plyus” formatidagi uchrashuvlarga tayyorgarlik masalalari ko‘rib chiqildi.