O‘zbekiston Iqtisodiyot va moliya vazirligi delegatsiyasi, vazir o‘rinbosarlari Umid Abidxodjayev va Samandar Sadullayev boshchiligida, “Toshkent irrigatsiya va qishloq xo‘jaligini mexanizatsiyalash muhandislari instituti” Milliy tadqiqot universiteti qoshidagi Buxoro tabiiy resurslarni boshqarish institutiga tashrif buyurdi. Tashrifning asosiy maqsadi hududlarda amalga oshirilayotgan “yashil” tashabbuslar va istiqbolli loyihalar bilan tanishishdan iborat edi.

Uchrashuv davomida institut ilmiy xodimlari ekish uchun yordamchi texnikalar, tabiiy o‘g‘itlarni ishlab chiqarish, shuningdek, issiqxonalarda tabiiy issiqlikdan foydalanib qishloq xo‘jaligi ekinlarini yetishtirish bo‘yicha olib borilgan tadqiqotlarni taqdim etdilar. Suv, yoqilg‘i va mineral o‘g‘itlarni tejash, mahsulot yetishtirish xarajatlari va vaqtini qisqartirish hamda hosildorlikni oshirishga qaratilgan ushbu loyihalarning amaliy ahamiyatiga alohida e’tibor berildi.