2025-yilda O‘zbekistonda renovatsiya dasturi doirasida 20 ming kvartirani o‘z ichiga olgan ko‘p qavatli uylar qurilishi rejalashtirilmoqda. Loyihaning amalga oshirilishi shahar hududidan foydalanish samaradorligini sezilarli darajada oshiradi va kommunal xarajatlarni ikki barobar kamaytiradi.

Eskirgan turar-joylarni zamonaviy ko‘p qavatli majmualarga almashtirish masalasiga alohida e’tibor qaratiladi. Bunday yondashuv nafaqat infratuzilmani yaxshilaydi, balki aholining turmush darajasini ham sezilarli darajada ko‘taradi. Yangilangan hududlarda yangi ish o‘rinlari yaratiladi, savdo obyektlari soni ko‘payadi, bu esa iqtisodiyot rivojiga qo‘shimcha turtki beradi.

Jizzax, Marg‘ilon, Qo‘qon, Shahrisabz, Qarshi shaharlari hamda Toshkent shahrining Do‘stlik tumani va boshqa tumanlarida renovatsiya ishlari jadal olib borilmoqda. Prezident bu tajribani boshqa hududlarga ham yoyish bo‘yicha ko‘rsatma berdi, chunki avariya holatidagi va eskirgan uylarda yashovchi aholi dasturning tezroq amalga oshirilishini intizorlik bilan kutmoqda.