14-yanvar kuni O‘zbekiston Transport vazirligi BAA ning JETEX kompaniyasi bilan hamkorlik memorandumini imzoladi. Memorandum doirasida fuqaro aviatsiyasi sohasida yangi investitsiya loyihasini amalga oshirish ko‘zda tutilgan.

Birlashgan Arab Amirliklaridan kelgan kompaniya “Toshkent-Sharqiy” aeroportida VIP va CIP mijozlarga xizmat ko‘rsatishni tashkil etishni taklif qildi. Ushbu loyiha FBO (Fixed Base Operator) shaklidagi davlat-xususiy sheriklik asosida hayotga tatbiq etiladi.

Kelishuv doirasida kompaniya biznes aviatsiyasi sohasida uskunalarni ta’mirlash, sotish va saqlash xizmatlarini yo‘lga qo‘yishni rejalashtirmoqda. Bundan tashqari, O‘zbekistonda aerotaksi va VIP taksi xizmatlari joriy etilishi mumkin. Bu nafaqat transport xizmatlari sifatini oshiradi, balki badavlat sayyohlarni jalb qilish orqali turizm sohasini rivojlantirishga ham ko‘maklashadi. Loyiha doirasida biznes-aviatsiya sohasi mutaxassislari uchun 200 dan ortiq yangi ish o‘rni yaratiladi.