Oliy Majlis Senatining uchinchi yalpi majlisida alkogol va tamaki mahsulotlari bozorini tartibga solishni takomillashtirishga qaratilgan Qonun ma’qullandi. Unda Bosh prokuraturaning Iqtisodiy jinoyatlarga qarshi kurashish departamenti huzurida faoliyat yurituvchi Inspeksiyaning vakolatlari aniqlanib, bozor subyektlarining davlat organlari bilan o‘zaro hamkorligi tartibga solingan.

Hujjat bilan ‘Davlat boji to‘g‘risida»gi, ‘Litsenziyalash, ruxsat berish va xabardor qilish tartib-taomillari to‘g‘risida»gi hamda «Alkogol va tamaki mahsulotlarining tarqatilishi hamda iste’mol qilinishini cheklash to‘g‘risida‘gi qonunlarga o‘zgartirishlar kiritilmoqda. Xususan, etil spirti, alkogolli mahsulotlar ishlab chiqarish va ulgurji savdo qilish uchun berilgan litsenziyalar bo‘yicha har yillik davlat bojini to‘lash muddatlari belgilandi.

Bundan tashqari, qonun yuridik shaxslarga vakolatli organlarni xabardor qilish orqali pivo, pivo ichimliklari va tamaki mahsulotlarining ulgurji savdosi bilan shug‘ullanish imkoniyatini beradi. Tamaki mahsulotlarini chakana sotish uchun esa soliq organlariga xabar berish talab etiladi.