O‘zbekistonda bioxilma-xillikni saqlash va ekotizimlarni tiklashga qaratilgan ikkita keng ko‘lamli ekologik loyiha boshlandi. Loyihalar Ekologiya vazirligi, BMTning Taraqqiyot dasturi va Tabiatni muhofaza qilish xalqaro ittifoqi (TXMI) hamkorligida, Global ekologik jamg‘arma (GEJ) moliyaviy ko‘magida amalga oshirilmoqda.

Birinchi loyiha biologik xilma-xillikni saqlash bo‘yicha Milliy strategiya va harakatlar rejasini yangilash hamda yettinchi milliy ma’ruzani tayyorlashga qaratilgan. O‘zbekiston o‘z faoliyatini xalqaro maqsadlarga moslashtirish va yangi milliy ko‘rsatkichlarni ishlab chiqish uchun 69 mamlakatni qamrab olgan global tashabbusda ishtirok etadi. Tabiatni muhofaza qilish sohasida uzoq muddatli siyosatni shakllantirish uchun davlat tuzilmalari, tadbirkorlik sub’ektlari va jamoatchilik o‘rtasida faol hamkorlik o‘rnatish ko‘zda tutilgan.

Ikkinchi loyiha mamlakatning alohida qimmatli ekotizimlarini tiklashga qaratilgan. G‘arbiy Tyan-Shan, Nurota tizmasi va Ko‘hitang tajriba hududlari sifatida tanlangan. Innovatsion yechimlar, inklyuziv yondashuvlar va barqaror moliyalashtirish mexanizmlarini joriy etish rejalashtirilmoqda. Ushbu tashabbusni amalga oshirishda 2024-yilda Toshkentda mintaqaviy ofisi ochilgan TXMI asosiy hamkor hisoblanadi.

Ekologiya vaziri o‘rinbosari Iskandar Qutbiddinov vazir Aziz Abduhakimovning murojaatini o‘qib eshittirdi va loyihalar Prezident tomonidan e’lon qilingan “Atrof-muhitni muhofaza qilish va ‘yashil’ iqtisodiyot yili” doirasida amalga oshirilayotganini ta’kidladi. U xalqaro hamkorlik tufayli salmoqli natijalarga erishilishiga ishonch bildirdi.