O‘zbekistonda birinchi marta bolaga jigar transplantatsiyasi muvaffaqiyatli amalga oshirildi. Noyob operatsiya o‘zbekistonlik va rossiyalik mutaxassislarning birgalikdagi ishi natijasi bo‘ldi.

Yuqori texnologik jarrohlik amaliyoti Toshkent shahridagi Bolalar milliy tibbiyot markazida Rossiya Federatsiyasi Sog‘liqni saqlash vazirligining Akademik V.I. Shumakov nomidagi Transplantatsiya va sun’iy a’zolar markazi yetakchi jarrohlari va transplantologlari ko‘magida o‘tkazildi.

Bemor surunkali jigar yetishmovchiligi va autoimmun gepatit bilan og‘rigan 15 yoshli bola edi. Uning ahvoli shoshilinch aralashuvni talab qildi va jigarni ko‘chirib o‘tkazish uni qutqarishning yagona imkoniyati bo‘ldi.

Operatsiyadan so‘ng o‘smirning ahvoli barqaror deb baholanadi. Ayni paytda u sog‘ayish jarayonini kuzatib borayotgan tibbiyot mutaxassislari nazorati ostida.