O‘zbekistonda faqat eksportga mo‘ljallangan yangi erkin iqtisodiy hududlar tashkil etilishi boshlanadi. Bu haqda Prezident Shavkat Mirziyoyev investitsiyalar va savdo masalalariga bag‘ishlangan yig‘ilishda ma’lum qildi.

Namangandagi to‘qimachilikka ixtisoslashgan EIZ bu turdagi birinchi hudud bo‘ldi. Prezident erkin iqtisodiy hududlarning mavjud tizimini qayta ko‘rib chiqish va eksport faoliyatini qo‘llab-quvvatlashga qaratilgan yangi yondashuvlarni ishlab chiqish bo‘yicha ko‘rsatmalar berdi.

2023-yilda O‘zbekistondagi 22 ta faol EIZ korxonalari tomonidan 42 trillion so‘mlik mahsulot ishlab chiqarildi. Biroq, Prezident ta’kidlaganidek, ushbu mahsulotlarning atigi 16 foizi yuqori texnologiyali bo‘lib, faqat 18 foizi eksportga yo‘naltirildi. Bundan tashqari, EIZlarda faoliyat yuritayotgan 589 ta korxonaning 372 tasi umuman eksport faoliyati bilan shug‘ullanmaydi.