Prezident Shavkat Mirziyoyev 3-fevral kuni aholi bandligini ta’minlash va investitsiyalarni jalb etish chora-tadbirlariga bag‘ishlangan yig‘ilish o‘tkazdi. Yig‘ilishda bu boradagi ishlarning dastlabki natijalari ko‘rib chiqildi va keyingi qadamlar belgilab olindi.

2025-yilgacha 5,2 million ish o‘rni yaratish, 1,5 million aholini kambag‘allikdan chiqarish, 42 milliard dollar xorijiy investitsiya jalb qilish va eksportni 30 milliard dollarga yetkazish rejalashtirilmoqda. Prezident bu yil ishsizlik va kambag‘allikka qarshi kurashda burilish yili bo‘lishi zarurligini ta’kidladi.

Dastlabki ma’lumotlarga ko‘ra, yanvar oyida 277 ming kishi ish bilan ta’minlandi, ularning 91 ming nafari doimiy ish topdi, 153 ming nafari esa tadbirkorlik faoliyatini boshladi. Kambag‘allikni samarali qisqartirish uchun 32 ta yo‘nalishda yangi yondashuvlar joriy etilmoqda. Yaqinda vazirlik va hokimliklardan bir guruh mutaxassislar Xitoyga tashrif buyurib, aholini qo‘llab-quvvatlashning samarali usullarini o‘rganishdi. Endi joylarda fuqarolarga daromadni oshirish bo‘yicha mavjud imkoniyatlar faol tushuntirilmoqda.

Ish o‘rinlarini yaratish bevosita investitsion faollik bilan bog‘liq. Joriy yilda mamlakatimizda 14 milliard dollarlik 8 mingta loyiha amalga oshirilib, 272 mingta yangi ish o‘rni yaratiladi. Yanvar oyida 3 milliard dollar xorijiy investitsiyalar jalb qilindi, fevral oyida esa 630 ta yangi loyiha ishga tushirilishi kutilmoqda.

Eksport ham o‘sish sur’atlarini ko‘rsatmoqda — yil boshidan buyon u 1,3 milliard dollarga yetdi. Mas’ul tashkilotlarga tadbirkorlarning tashqi bozorlarga chiqishiga, xorijiy hamkorlar bilan aloqalarni o‘rnatishga va mamlakatning eksport salohiyatini kengaytirishga faol ko‘maklashish vazifasi topshirildi.