O‘zbekistonda respublikaning Birinchi Prezidenti Islom Karimov tavallud kuniga bag‘ishlangan tadbirlar o‘tkazildi. 30-yanvar kuni Prezident Shavkat Mirziyoyev mustaqil O‘zbekiston asoschisi haykaliga gul qo‘ydi.

Marosimda Oliy Majlis, hukumat, jamoatchilik va ziyolilar vakillari ishtirok etdilar. Qatnashchilar o‘z hayotini mamlakat taraqqiyotiga baxshida etgan rahbarning xotirasi, mustaqillikni mustahkamlashdagi xizmatlari va hissasini yod etdilar. Qur’on tilovati qilindi va duolar o‘qildi.

Shavkat Mirziyoyev tashabbusi bilan Birinchi Prezident xotirasi abadiylashtirilib, har yili 30-yanvar uning tug‘ilgan kuni sifatida nishonlanmoqda. Toshkentda ilmiy-ma’rifiy memorial majmua barpo etildi, Samarqanddagi Islom Karimov maqbarasini ziyorat qilish esa ezgu an’anaga aylandi.

Xotira tadbirlari Samarqand va Qarshi shaharlarida ham o‘tkazilib, aholi va mahalliy hokimiyat vakillari mamlakatimiz tarixida o‘chmas iz qoldirgan insonga hurmat bajo keltirdilar.