Senatning uchinchi yalpi majlisida jonli ijro san’atini rivojlantirishga qaratilgan qonun ma’qullandi. Ushbu qonun madaniy faoliyat, iste’molchilar huquqlarini himoya qilish va reklama sohasidagi qonun hujjatlariga o‘zgartirishlar kiritishni ko‘zda tutadi.

Yangi qoidalar davlat madaniy tadbirlarida jonli ijro va fonogrammalardan foydalanish darajasi hamda usullariga qo‘yiladigan talablarni belgilaydi. Madaniyat vazirligiga sohaga oid qonunchilikka rioya etilishini nazorat qilish, ijodkorlarni qo‘llab-quvvatlash va milliy san’atni ommalashtirish vakolati berildi.

Madaniy tadbirlar haqidagi reklama ma’lumotlarining shaffofligiga alohida e’tibor qaratilmoqda. Bundan buyon reklamalarda fonogrammalardan foydalanish darajasi ko‘rsatilishi shart bo‘lib, bu ma’lumot reklama maydonining kamida 10 foizini egallashi lozim. Bunday yondashuv tomoshabinlarga konsertlarni ongli ravishda tanlash, musiqiy asarlarning qay darajada jonli ijro etilishini va ularning muallifi kim ekanligini bilish imkonini beradi.