Oliy Majlis Qonunchilik palatasining yig‘ilishida tovarlarni raqamli markirovkalash tizimini takomillashtirish va aholini kontrafakt mahsulotlardan himoya qilishni kuchaytirish maqsadidagi qonun loyihasi muhokama qilindi. Birinchi o‘qishda ko‘rib chiqilgan hujjatda tadbirkorlar uchun soliq yukini kamaytirish choralari ko‘zda tutilgan.

Xususan, biznesga markirovkalash uskunalarini xarid qilish xarajatlarini yengillashtirish, shuningdek, yakka tartibdagi tadbirkorlarning foyda, aylanma va daromad solig‘ini pasaytirish taklif etildi. Bundan tashqari, pivo mahsulotlarini chakana sotish soliq organlariga xabar berish talab etiladigan faoliyat turlari ro‘yxatiga kiritiladi.

Deputatlar ushbu o‘zgarishlar qonuniy biznes uchun qulay sharoitlar yaratishini va tovar aylanmasining shaffofligini oshirishini ta’kidladilar. Choralar tamaki va pivo mahsulotlarini yashirin ishlab chiqarishga qarshi kurashishga ko‘maklashishi, shuningdek, iste’molchilarni qalbaki mahsulotlardan himoya qilishga yordam berishi kutilmoqda.

2025-yil 13-yanvar holatiga ko‘ra, O‘zbekiston Milliy katalogida 110 897 nomdagi markirovkalangan mahsulot ro‘yxatga olingan. Ular orasida eng ko‘p ulushni maishiy texnika (67 550 ta), alkogol mahsulotlari (13 031 ta) va dori vositalari (12 022 ta) tashkil etadi.

Markirovkalangan tovarlar soni bo‘yicha Toshkent shahri yetakchilik qilmoqda — 88 977 nomda. Hududlar orasida eng yuqori ko‘rsatkichga ega bo‘lgan uchlikka Toshkent viloyati (8 780 ta) va Samarqand viloyati (3 929 ta) ham kiradi.