Oliy Majlis Qonunchilik palatasi 14-yanvar kuni mahalla raislarining vakolat muddatini uch yildan besh yilga uzaytiruvchi qonun loyihasini qabul qildi. Bu haqda parlament quyi palatasi matbuot xizmati xabar berdi.

Deputat Abdulla Aslanov qonun Prezidentning 2023-yil 21-dekabrdagi qarorida bayon etilgan tashabbusi va Prezident Administratsiyasining 2024-yil 31-dekabrdagi xati asosida ishlab chiqilganini ta’kidladi.

Yangi qonun mahalla raislarini, shu jumladan vakolatlari tugagan raislarni ham, besh yillik muddatga saylash tartibini joriy etadi. Endilikda saylovni o‘tkazish mas’uliyati Senat kengashidan viloyatlar, Toshkent shahar xalq deputatlari va Qoraqalpog‘iston Respublikasi Jo‘qorg‘i Kengesi kengashlariga o‘tkazildi. Saylovni o‘tkazish bo‘yicha respublika komissiyasi o‘z vakolatlarini hududiy komissiyalarga topshiradi, fuqarolarning o‘zini o‘zi boshqarish organlari faoliyatini muvofiqlashtirish bo‘yicha kengashlar esa mahallalarni qo‘llab-quvvatlash kengashlari deb qayta nomlandi.

Abdulla Aslanov o‘zini o‘zi boshqarish organlarini boshqarishning xalqaro tajribasi, jumladan Yaponiya, Turkiya, Xitoy va Hindiston kabi davlatlar amaliyoti o‘rganilganini ma’lum qildi. U 2025-yil may oyiga belgilangan saylovlarni moliyalashtirish davlat byudjetida ko‘zda tutilganini ham aniqlashtirdi.

Qonunchilik palatasi spikeri Nuriddin Ismoilov qonun asosan texnik tuzatishlardan iborat ekanini ta’kidlab, uni birdaniga uch o‘qishda qabul qilishni taklif etdi. “Bizda ko‘rib chiqilishi lozim bo‘lgan qirqdan ortiq qonun qolgan. Qonunlarning tez qabul qilinishi ularning sonini kamaytirishga yordam beradi,” dedi u.

Qonun loyihasi birinchi o‘qishda 134 ta ovoz bilan yoqlab, bir kishi betaraf qolgan holda qabul qilindi.